Psikiatrit Japin Alarmin: Është Rritur Numri I Adoleshentëve Impotentë
Psikiatrit dhe psikologët japin alarmin për rritjen e numrit të adoleshentëve dhe të rinjve, që u drejtohen atyre, pasi nuk arrijnë të kryejnë dot marrëdhënie seksuale. Sipas psikiatres, Arjana Reli këta të rinj janë persona, që janë përdorues të stimulatëve të ndryshëm si duhani, alkooli deri dhe drogat. Të paktën 10 të rinj të tillë çdo muaj i drejtohen për ndihmë psikatrit.
“Gjatë një muaji mund të rrotullohet te 10 persona, por jam e sigurt që janë shumë më tepër. Nuk janë të rralla rastet që vijnë me ankesën e parë një disfunksion seksual, një pamundësi për të kryer deri në fund një marrëdhënie seksuale apo një ankth i shtuar qoftë edhe gjatë fillimi të një marrëdhënie me seksin e kundërt”,-thotë Reli.
Çrregullimet psikike që ata shfaqin janë nga më të lehtat deri në më ekstremet. Psikiatria Reli, thotë tek ata të rinj dhe adoleshentë, konstatohet ankth, deri dhe depresionet e formave më të rënda.
“Mund ta çojë minimumi në ankth, i cili prapë nuk e lë që të kryejë deri në fund një marrëdhënie seksuale. Ky ankth, bashkë me këtë lloj defiçiti shkon deri në depresion. Ankthi është zilja paralajmëruese e një çrregullimi të humorit. Mund të çojë pak në sjellje agresive, dmth, jashtë kuadrit të sjelljes normale”,-thekson ajo.
Këta persona pas bisedave me psikiatrit lënë të kuptohet se të gjithë stimulantët i kanë nisur, pasi kanë pasur probleme të mëdha në familjet e tyre. Nga ato ekonomike deri dhe ato sociale, të cilat kanë të bëjnë dhe me mungesën e komunikimit mes prindërve dhe fëmijëve, që në vegjëli.
